LAMENTU PRI TRI PALUMMI A
Carlo Alberto Dalla Chiesa
Lu tri sittembri di milli novicevtu ottantadui
mentri la genti era ancora alluffata di sciloccu
‘na vuci ca parsi un pugnu nni la panza
si sparpagghiò a macchia d’ogghiu
sbattuliannu comu petra, tra pisci, feddi di muluna
e stigghiola, di lu burgu vecchiu a la marina.
“Curriti curriti, hannu arrubbatu lu ciatu
a tri beddi palummi e ammazzatu la spiranza
di li palirmitanu onesti!”
La spiranza ca lu novu prifettu quasi di “ferru”
ma cu lu cori di burru, puteva cu lu so’ ‘ncignu scuvari
non sulu cimici e pidocchi ammunziddati a rappi
nna li campagni e ‘mmenzu la miseria, ma corvi, jeni
mascariati di boni cristiani e ‘ngramagghiati
'ntra scurusi disigni di pulitica e affari
c’a porti ‘nchiusi s’incutravanu a pigghiari lu cafè
supra ‘nguanteri d’argentu cu li viscotta
nna li saluna tapizzati di priziusu damascu e roccocò
d’antichi nobili palazzi ca ciaurìanu ancora
di lagrimi sangu ‘mbrogghi e vecchi vavusi baruna.
Pri centu jorna lu ‘mbriacò Palermu, cu festi balli…
forsi fu propriu lu disìu d’annittari lu suli
di riscriviri la storia spugghiata di minzogni
ca lu ‘ngannò, ca senza sapiri purtò cu li so’ pedi
sangu a la ciumara e testi sutta lu cippu di lu boja.
Nun era Pasqua e mancu Natali
ma dda sira nni la terra ciarusa di zagara e lumiuna
a tavula cunzata arrivò l’arrustu e lu fumu
prufumatu d’amenta e pitrusinu pri stunari lu fetu
‘nfruscari, mmastardiri cu lu ventu di “palazzu” li trami.
Comu ciuri senza gammi, pupi senza filu, rinnini senz’ali
tutti tri caderu ‘nzemmula lu menzu celu lustru
l’assulata spiranza e a lu curaggiu d’un prifettu
c’aveva capitu d’aviri gatti di pilari, purpi di piscari
ma nun vosi lassari ‘n tridici lu jocu e fu notti funna ‘m Palermu.
Tutti lu sapevanu, li cani e li gatti si lu ciuciulavanu
strati strati e nni l’aricchi: “lu boja ca di li cani
li fici spurpari, è lu stissu ca mannò la prima curuna”…
li vulpi a lu putiri, li giornalisti (tranni unu ca ci rimisi la testa)
ancora ‘na vota ficiru finta di nun capiri…
Comu scecchi arrassignati a un distinu di fatica
nuàutri li ‘ntrappinnenti, eroici palermitani
cu la testa nno saccuni, orbi e muti li vurricamu
senza mancu arragghiari pri lu duluri
‘nzemmula a la dignità e l’ultimi tri soldi di curaggiu.
Certu si sapi, la mafia è sempri prima attrici
nna li tragedi siciliani, si vesti, si travesti
si pitta, recita a suggettu, s’ammuccia, s’addumisci
appari scumpari.…ma nna “LU JOCU DI LI PARTI”
fu lu sirpenti cu lu jmmu e li sunagghi, primu atturi.
Deci anni doppu, supra autri occhi, gammi , vrazza
ca sdisangaru li cori e puru li ciachi
s’arruspicchiù Palermu di lu malugnu ‘ncantu
e mentri lu sirpenti sfurbiciannu ancora vilenu
pirdeva mascara e cuda, iu in Via d’Ameliu scriveva:
Di lu sangu di li giusti comu araba fenici rinasci la spiranza!
Ora semu ccà, all’ultima firmata di la pacenzia
e cu li manu ‘nciancu a punta di cantunera
aspittamu ancora lu tram di la giustizia, spirannu
c’almenu ‘sta vota nun porta li soliti cinqant’anni di ritardu!
2 settembre 1998
DI LINA MATTINA TRATTA DAL LIBRO
"PARABULA SIGNIFICA" 2004
